Nga 1 tetori, konsumatorët në Kosovë do të mund të ndërrojnë operatorin e telefonisë dhe ta ruajnë numrin e tyre ekzistues, njofton Autoriteti Rregullativ i Komunikimeve Elektronike dhe Postare (ARKEP).
Bartja e numrit do të jetë pa pagesë për përdoruesit.
Sipas ARKEP-it, konsumatorët nuk do të kenë nevojë të ndryshojnë numrin e telefonit edhe nëse kalojnë nga një operator në tjetrin.
Për procesin e bartjes nuk do të aplikohet tarifë nga operatori i vjetër apo operatori i ri.
Bartshmëria u mundëson konsumatorëve të zgjedhin operatorin që u përshtatet më shumë, pa pasur nevojë t’i njoftojnë kontaktet për ndryshimin e numrit.
Para se të kërkohet bartja, konsumatori duhet të sigurohet se numri është i regjistruar në emrin e tij.
Nëse numri është i regjistruar në emër të një personi tjetër, kërkohet autorizim i vlefshëm nga mbajtësi aktual i numrit.
ARKEP thekson se për numrat me faturim mujor, bartja e numrit nuk i anulon borxhet apo detyrimet kontraktuale ndaj operatorit të mëparshëm.
Borxhet e vonuara ose shërbimet e bllokuara mund të jenë arsye për refuzimin e kërkesës për bartje.
Ndërkaq, konsumatorët duhet t’i ruajnë kontaktet para ndërrimit të operatorit, pasi të dhënat e ruajtura në SIM-kartelën e vjetër nuk transferohen automatikisht.
