Artan Nimani nga Nisma Socialdemokrate ka deklaruar se ky subjekt politik nuk ka ndryshuar qëndrim lidhur me votimin e nënkryetarit të pestë të Kuvendit të Kosovës nga komuniteti serb.
Nimani ka theksuar se Nisma nuk do të jetë pengesë për krijimin e institucioneve të vendit, por as nuk do të kërkojë funksione të caktuara pa ndonjë marrëveshje politike të qartë.
“Tashmë është e qartë se kujt i takon nënkryetari i pestë i Kuvendit. Ne si Nismë nuk kemi ndryshim të qëndrimit tonë, për momentin ky është qëndrimi që kemi deklaruar edhe në seancën e fundit sepse Nisma nuk do të jetë pengesë për krijimin e institucioneve, por as nuk do të ngarendë pas funksioneve pa ndonjë marrëveshje politike të qartë. Për ne, nuk ka asnjë marrëveshje politike me asnjë subjekt tjetër”, tha ai në emisionin “Ditari” në Tëvë1.
Ai shtoi se ata që kanë krijuar krizën politike në Kosovë duke mos i themeluar institucionet, duhet të japin fund asaj.
“Unë mendoj se ata që kanë krijuar krizën, pra deputetët e shumicës parlamentare dhe forcat e tjera politike që i kanë ndihmuar, duhet që ashtu siç kanë planifikuar themelimin e institucioneve, ta përfundojnë atë,” përfundoi Nimani.
Ndryshe, pas publikimit të plotë të aktgjykimit të Gjykatës Kushtetuese lidhur me konstituimin e Kuvendit të Kosovës, ky institucion ka bërë të ditur se nesër do të vazhdojë me seancën konstituive.
Në seancën e nesërme që nis në orën 10:00, në rend dite është pika e zgjedhjes së nënkryetarit të Kuvendit nga radha e komunitetit serb.
Gjykata Kushtetuese ka konstatuar se zgjedhja e nënkryetarit nga radhët e komunitetit serb është e domosdoshme për përmbylljen e konstituimit të Kuvendit të Kosovës.
Sipas saj, votimi “në pako” për nënkryetarët e Kuvendit nuk është i imponueshëm, por mund të realizohet me dakordim ndërmjet grupeve parlamentare.
