Papa Leo XIV, udhëheqësi shpirtëror i katolikëve në mbarë botën dhe kreu i Vatikanit, të enjten përgëzoi punën e gazetarëve që rrezikojnë jetën e tyre për t’ia përcjellë të vërtetën publikut,
Ai tha se: “Nëse sot e dimë se çfarë po ndodh në Gaza, Ukrainë dhe në çdo vend tjetër të përgjakur nga bombat, ua kemi borxh kryesisht atyre.”
Papa mirëpriti në Vatikan krerët dhe drejtuesit e agjencive kryesore të lajmeve në botë.
Në fjalimin e tij para Konferencës së 39-të dhe Asamblesë së Përgjithshme të Jashtëzakonshme të delegacionit të Unionit të Agjencive Ndërkombëtare të Lajmeve MINDS, Leo theksoi se, ndërsa komunikimi është thelbësor, është po aq e rëndësishme të merret në konsideratë se kush po komunikon dhe për çfarë qëllimi.
Duke theksuar se sektori i medias nuk duhet ta ndajë punën e tij nga ndarja e së vërtetës, Papa tha se media luan një rol jetësor në ndihmën për të formësuar ndërgjegjen dhe për të zhvilluar të menduarit kritik, shkruan Anadolu.
Papa theksoi punën e vështirë që bëjnë gazetarët, shpesh përballë vdekjes, për të kryer detyrat e tyre.
“Në kohë si e jona, të shënuara nga konflikte të përhapura dhe të dhunshme, shumë njerëz kanë vdekur gjatë kryerjes së detyrave të tyre. Ata janë viktima të luftës dhe të ideologjisë së luftës, e cila kërkon t’i pengojë gazetarët të jenë aty fare. Nuk duhet t’i harrojmë!”, u lut ai.
Papa Leo, menjëherë pas zgjedhjes së tij në maj, tha në një takim me gazetarë nga e gjithë bota se bëri thirrje për lirimin e gazetarëve që ishin persekutuar dhe burgosur padrejtësisht, dhe se dëshironte ta përsëriste këtë thirrje sot.
Duke e quajtur punën e agjencive të lajmeve “të paçmuar”, Leo theksoi mjedisin e tyre të punës me presion të lartë: “Siç e dini mirë, ata që punojnë për një agjenci lajmesh pritet të shkruajnë shpejt, nën presion, madje edhe në situata shumë komplekse dhe dramatike. Për këto arsye, shërbimi juaj kërkon kompetencë, guxim dhe një ndjenjë etike. Kjo është e paçmuar dhe duhet të jetë një antidot ndaj përhapjes së informacionit “të pavlerë”.”
“Qasja e lirë në informacion është një shtyllë që mbështet ndërtesën e shoqërive tona dhe për këtë arsye, ne jemi të thirrur ta mbrojmë dhe garantojmë atë”, tha ai.
