Për dallim prej Superligës, Liga e Parë e Kosovës nuk ka pushim përkundër ndeshjeve të Kombëtareve.
Kështu që, ndeshjet e Ligës së Parë vazhdojnë këtë javë, me xhiron e 11-të që nis të premten dhe mbyllet të shtunën.
Ndeshja hapëse e kësaj xhiroje është ajo ndërmjet Tefik Çangës dhe Prizrenit që luhet në Ferizaj prej orës 15:00.
Skuadra vendase vlerësohet favorite në këtë përballje, duke pasur parasysh se renditet e treta në tabelë me 20 pikë, 10 më shumë se Prizreni që është në pjesën e poshtme të tabelës.
Ndërkohë, tetë ndeshjet tjera të xhiros së 11-të, luhen të shtunën dhe nisin nga ora 15:00.
Përballjet interesante do të jenë Liria – Trepça që luhet në Prizren dhe Vushtrria – Feronikeli ’74, që zhvillohet në Vushtrri.
Çiftet tjera, të kësaj xhiroje janë: Kika – Trepça ’89, Suhareka – Besa, Dinamo – Vëllaznimi, Rilindja – Ramiz Sadiku, Vjosa – Istogu dhe KEK-u – 2 Korriku.
