Liderët kryesorë evropianë kanë reaguar pas njoftimit të një marrëveshjeje që synon t’i japë fund luftës në rajon, duke e përshëndetur si një hap të rëndësishëm drejt paqes dhe duke theksuar nevojën për një zgjidhje politike të qëndrueshme.
Ursula von der Leyen, kryetare e Komisionit të BE-së, e ka mirëpritur marrëveshjen e armëpushimit dhe ka vlerësuar përpjekjet e SHBA-së, Katarit, Egjiptit dhe Turqisë në “arritjen e këtij përparimi”.
“Tani, të gjitha palët duhet t’i përmbahen plotësisht kushteve të marrëveshjes. Të gjithë pengjet duhet të lirohen në mënyrë të sigurt. Duhet të vendoset një armëpushim i përhershëm. Vuajtjet duhet të marrin fund”, shkroi ajo.
Presidenti francez, Emmanuel Macron, deklaroi se Franca do të vazhdojë përpjekjet diplomatike në bashkëpunim me partnerët ndërkombëtarë për të çuar përpara një zgjidhje politike afatgjatë për konfliktin, shkruan Al Jazeera.
“Kjo marrëveshje duhet të shënojë fundin e luftës dhe fillimin e një zgjidhjeje politike të bazuar në zgjidhjen me dy shtete,” tha Macron në postimet në X.
Në të njëjtën linjë, Kryeministri spanjoll Pedro Sanchez shprehu optimizëm për të ardhmen, duke e përshkruar marrëveshjen si një hap drejt paqes.
“Shpresoj që marrëveshja shënon fillimin e një paqeje të drejtë dhe të qëndrueshme. Tani është koha për t’u angazhuar në dialog, për të mbështetur popullsinë civile dhe për të parë të ardhmen me shpresë. Por edhe me drejtësi dhe me kujtesë, në mënyrë që mizoritë e përjetuara të mos përsëriten kurrë,” tha ai.
Kryeministrja italiane, Giorgia Meloni reagoi me entuziazëm ndaj zhvillimeve të fundit. Ajo e përshëndeti njoftimin si një “lajm të jashtëzakonshëm” dhe bëri thirrje për zbatim të menjëhershëm të marrëveshjes.
Ndërkohë, Ministri i Jashtëm holandez, David van Weel, shprehu shpresë se kjo marrëveshje do të kontribuojë në një paqe më të gjerë në rajon.
