Shtetet anëtare të Bashkimit Evropian ranë dakord të mërkurën mbi pozicionin e përbashkët të Këshillit për të nxitur investimet në sektorin e mbrojtjes brenda kuadrit financiar të BE-së, në kuadër të iniciativës ReArm Europe.
Kjo nismë ka për qëllim forcimin e kapaciteteve ushtarake të bllokut dhe rritjen e shpenzimeve për mbrojtje.
Ky qëndrim synon të hapë disa prej programeve më të rëndësishme të BE-së ndaj projekteve të orientuara drejt mbrojtjes dhe të përshpejtojë, si dhe të koordinojë më mirë, investimet në Bazën Teknologjike dhe Industriale Evropiane të Mbrojtjes (EDTIB).
“Me qëndrimin e dakordësuar të Këshillit, ne duam t’i hapim programet kryesore të BE-së për më shumë investime në mbrojtje dhe po mundësojmë një përpjekje më të shkathët dhe të koordinuar për të forcuar Bazën Industriale dhe Teknologjike të Mbrojtjes së Evropës.
Është një hap i nevojshëm drejt rritjes së mëtejshme të gatishmërisë së mbrojtjes së BE-së drejt vitit 2030”, deklaroi Ministrja e Çështjeve Evropiane të Danimarkës, Marie Bjerre, shrkuan Anadolu.
Edhe pse shtetet anëtare shprehën mbështetje të gjerë për propozimin e Komisionit Evropian, Këshilli shtoi një dispozitë të re që rregullon përshtatshmërinë e aktiviteteve me përdorim të dyfishtë dhe aplikime mbrojtëse brenda programit Horizon Europe, duke i harmonizuar ato me instrumentet e tjera të mbrojtjes të BE-së.
Pas miratimit nga ana e Këshillit, presidenca e radhës e BE-së do të nisë negociatat me Parlamentin Evropian, me synimin për të arritur një marrëveshje përfundimtare përpara fundit të vitit 2025.
Kjo iniciativë është pjesë plotësuese e “paketës omnibus të gatishmërisë mbrojtëse” të propozuar nga Komisioni Evropian në qershor 2025, e cila aktualisht është duke u shqyrtuar në Këshill.
Të dyja propozimet përbëjnë elementë kyç të përpjekjeve të përgjithshme për të forcuar gatishmërinë mbrojtëse të Evropës, në përputhje me përfundimet e Këshillit Evropian të marsit 2025.
Plani ReArm Europe/Readiness 2030 parashikon të mobilizojë deri në 800 miliardë euro (929 miliardë dollarë) në shpenzime për mbrojtjen gjatë pesë viteve të ardhshme.
