Ambasadori i Bashkimit Evropian në Kosovë, Aivo Orav, ka theksuar rëndësinë e pjesëmarrjes së qytetarëve në zgjedhjet lokale që do të mbahen këtë të diel, duke e cilësuar procesin si një test të rëndësishëm për demokracinë e vendit.
Në një reagim, Orav u bëri thirrje të gjithë qytetarëve me të drejtë vote që të marrin pjesë në procesin zgjedhor dhe të kontribuojnë në një proces të rregullt, transparent dhe gjithëpërfshirës.
“Me zgjedhjet lokale që mbahen këtë të diel, u bëj thirrje të gjithë votuesve me të drejtë vote – pavarësisht përkatësisë etnike apo preferencës partiake – të dalin në votime dhe të zgjedhin përfaqësuesit e tyre,” tha ambasadori Orav.
Ai nënvizoi se respektimi i standardeve demokratike është thelbësor për forcimin e institucioneve dhe për rrugën evropiane të Kosovës.
“Është thelbësore që procesi i votimit të zhvillohet në mënyrë të lirë, të drejtë dhe gjithëpërfshirëse, që vullneti i votuesve të respektohet dhe rezultatet të zbatohen,” shtoi Orav.
Ambasadori e quajti këtë proces “një provë për demokracinë e Kosovës”, duke theksuar se suksesi i zgjedhjeve do të ndikojë drejtpërdrejt në perceptimin e vendit si partner i besueshëm në integrimet evropiane.
“Këto zgjedhje lokale janë një provë për demokracinë e Kosovës. Kalimi me sukses i kësaj prove i hap Kosovës mundësi të reja,” përfundoi ai.
