Më shumë se 80 parlamentarë nga e gjithë Evropa dënuan të martën sulmin e Izraelit ndaj Flotiljes Globale Sumud dhe kërkuan lirimin e menjëhershëm të të gjithë vullnetarëve që ende mbahen në paraburgim.
Në një deklaratë të përbashkët, anëtarët e Asamblesë Parlamentare të Këshillit të Evropës (PACE) dhe Parlamentit Evropian thanë se flotilja “nuk mbante armë, por mbante shpresë” dhe i përshkruan veprimet e Izraelit si një “shkelje flagrante të së drejtës ndërkombëtare”.
Karvani i aktivistëve, gazetarëve, ligjvënësve dhe vullnetarëve u ndalua nga Marina Izraelite më 1 tetor, ndërsa po përpiqej të dërgonte ushqim dhe ndihmë mjekësore në Gaza.
Më shumë se 450 persona u arrestuan, ndërsa deportimet vazhdojnë, përfshirë 137 në Turqi dhe 171 në Greqi dhe Sllovaki. Sipas deklaratës, shumë prej tyre mbeten në një burg të sigurisë së lartë.
Ligjvënësit thanë se raportet nga të paraburgosurit e liruar tregonin për “mungesë të ilaçeve thelbësore, ushqim dhe ujë të pamjaftueshëm, kushte johigjienike, poshtërim, mohim të avokatit dhe aksesit konsullor, si dhe vonesa arbitrare” – trajtim që ata paralajmëruan se mund të shkelte të drejtën ndërkombëtare humanitare.
Parlamentarët u kërkuan qeverive të ushtrojnë presion për “lirimin e menjëhershëm dhe pa kushte” të atyre që janë ende të ndaluar, të sigurojnë kujdes mjekësor, këshillim ligjor dhe kontakt familjar, si dhe të lejojnë akses të pavarur nga OKB-ja dhe KNKK-ja, shkruan Anadolu.
Ata gjithashtu bënë thirrje për një hetim ndërkombëtar dhe riafirmuan “paprekshmërinë e misioneve humanitare”.
