Krahu i armatosur i Xhihadit Islamik Palestinez (PIJ) ka reaguar zyrtarisht ndaj planit të propozuar nga presidenti amerikan, Donald Trump për t’i dhënë fund konfliktit në Rripin e Gazës.
Ky plan, i cili aktualisht po diskutohet në Egjipt mes palëve të përfshira, ka vazhduar ditën e dytë të martën.
Në një deklaratë të publikuar nga krahu i armatosur, të cituar nga Al Jazeera, theksohet qartë se: “Robërit nuk do të lirohen përveçse nëpërmjet një marrëveshjeje shkëmbimi në të cilën Izraeli zotohet t’i japë fund luftës.”
Deklarata vë në dukje se qëndrimi i fraksioneve palestineze është i bashkuar sa i përket përfundimit të luftimeve dhe kthimit të stabilitetit në territoret palestineze.
“Të gjitha fraksionet palestineze nuk do të kursejnë asnjë përpjekje për të gjetur një mënyrë për t’i dhënë fund luftës dhe vuajtjeve të palestinezëve.”
Përfaqësuesit e Xhihadit Islamik nënvizojnë gjithashtu se armët e tyre nuk do të heshtin derisa të realizohen objektivat kryesore të rezistencës.
“Arma e rezistencës ekziston për të çliruar tokën dhe për të luftuar armikun, dhe nuk do të vendoset në mill derisa të arrihen këto dy qëllime.”
PIJ u themelua në vitin 1981 nga studentë palestinezë në Egjipt me qëllim krijimin e një shteti palestinez në Bregun Perëndimor, Gaza dhe zona të tjera të pushtuara ilegalisht nga Izraeli.
