Trajneri i Italisë në grumbullimin e lojtarëve ka theksuar rëndësinë për të marrë të 6 pikët në përballjet me Estoninë dhe Izraelin.
Edhe pse mundësitë për të kapur vendin e parë janë të pakta,
Kombëtarja italiane është grumbulluar në prag të dy ndeshjeve vendimtare të kualifikimeve për Kupën e Botës 2026, kundër Estonisë më 11 tetor dhe Izraelit më 14 tetor.
Aktualisht, e renditur e dyta në Grupin I, me pak mundësi për të kapur Norvegjinë, që kryeson me një diferencë të ndjeshme golash.
Në konferencën për shtyp, trajneri Gennaro Gattuso foli për gjendjen e ekipit, mungesat dhe zgjedhjet taktike për ndeshjet e ardhshme.
“Më vjen keq për Zaccagnin dhe Politanon, por kemi lojtarë që mund të ndihmojnë. Zgjedhjet janë bërë duke menduar për mënyrën si do të luajmë në të dyja ndeshjet,” – tha Gattuso.
Tekniku u ndal edhe te mundësia që Ahanor dhe Tresoldi t’i bashkohen së shpejti ekipit kombëtar, ndërsa e quajti pozitive idenë që ndeshja Milan–Como të zhvillohet në Australi, duke e konsideruar pjesë të futbollit modern dhe një mundësi për rritje ekonomike.
Për mungesën e Federico Chiesës, Gattuso sqaroi se “nuk ka asnjë rast apo sekret. Kam folur gjatë me të, nuk ndihet 100 për qind dhe duhet të zgjidhë disa probleme fizike. E respektoj vendimin e tij.”
Sa i përket sistemit të lojës, Gattuso pranoi se mund të përdorë mbrojtje me tre, edhe pse nuk është moduli i tij i preferuar.
“Një trajner duhet të dijë të përshtatet. Nuk më pëlqen shumë, por ajo që ka rëndësi është çfarë i shkon më mirë skuadrës.”, sqaroi ai.
Ndërkohë, Nicolussi Caviglia dhe Cambiaghi do të kenë rastin e debutimit me fanellën azzurre, me Gattuson që i vlerësoi për ekuilibër, cilësi dhe përkushtim.
Tekniku theksoi gjithashtu rëndësinë e skautimit aktiv, duke u shprehur se “Federata duhet të shpenzojë për të parë sa më shumë ndeshje nga afër”, sepse vetëm kështu mund të shpërblehen lojtarët që e meritojnë.
Në mbyllje, Gattuso paralajmëroi se mund të ketë rotacion në dy ndeshjet, por prioritet mbetet fitorja ndaj Estonisë dhe fokusimi maksimal në çdo seancë stërvitore.
