Më 26 mars Kosova mori njohje të re.
Ajo erdhi nga Republika e Kenias, vend ky në Afrikën Jugore.
Në prill, Kosova mori edhe një njohje, atë nga Sudani i cili u bë shteti i 119-të që njeh Pavarësinë e Kosovës.
Por, sipas njohëseve të politikës së jashtme, vlerësohet se nuk është punuar shumë që vendi të sigurojë njohje të reja.
Analisti Ilir Deda thotë për Tëvë1 se Republika e Kosovës duhet të anëtarësohet paraprakisht në Këshill të Evropës dhe në NATO, që vendi të gëzojë më shumë njohje.
“Unë mendoj se Kosova përveç kësaj duhet ta rrumbullakësoj Pavarësinë në nivel të kontinentit evropian, e cila bëhet vetëm me anëtarësim në Këshill të Evropës, pa anëtarësim në Këshill të Evropës nuk e mrrijmë këtë, njëjtë do të ndihmon ajo në të ardhmen për marrjen e statusit kandidat me BE-në, edhe anëtarësim për partneritet për paqe të NATO-së. Këto janë objektive të vet qeverisë në programin e tyre qeverisës të cilët nuk i kanë mbërri për fat të keq as nuk e kanë kuptuar këto shtetet njohëse që i patëm nga dy shtetet afrikane, pse kanë ndodhur, ne po përfundojmë në një pozicion që po i humbim mundësitë”, shprehet Deda.
Në anën tjetër hulumtuesi në organizatën joqeveritare, PIPS, Jon Krasniqi thotë se Ministria e Punëve të Jashtme, sipas raportit për vitin 2024-2025, nuk ka lëvizur përpara për të siguruar njohje nga pesëshja mosnjohëse e Kosovës.
“ Në lidhje me pesshën mos njohëse nuk ka pasur shumë lëvizje gjatë vitit 2024 dhe 3 mujorin e parë të vitit 2025, atë që edhe e mbulon raporti i Politikës së Jashtme por gjithashtu vërejmë se ka pas një lëvizje më konstruktive me Greqinë takime më të shpeshta të kryeministrit Kurti me homologun në Greqi, por edhe pas disa marrëveshjeve ekonomike nuk ka lëvizje për njohjen e Kosovës, kjo ka të bëjë edhe qëndrimin të cilin e ka Greqia në marrëdhëniet me Serbinë por edhe dialogun Kosovë-Serbi që mbahet nga Bashkimi Evropian” , thotë Krasniqi.
Ndërkaq, Deda theksoi rëndësinë për dy shtetet që njohën Kosovën, por sipas tij, mësimet nuk u nxorën.
“Ne i patëm dy njohje më herët sivjet, duke iu falënderu Republikës së Turqisë dhe Behxhet Pacollit, dhe më duket se Kosova nuk i kuptoi dmth, ato njohje janë bërë që japin siguri Kosovës që të ecë përpara, nga pozicioni ku është. Por si duket në udhëheqësin tonë, nuk është lexuar drejtë kjo punë edhe është ndalë” , thotë ai.
Serbia vazhdimisht ka deklaruar se do të nisë fushatën e saj ndaj vendeve që njohin Kosovën, duke bërë thirrje për çnjohje, ndërkaq autoritetet në vend, këto deklarata i kanë parë si shkelje të çdo marrëveshje të arritur deri më tani me Serbinë.
