Një numër gjithnjë e në rritje vendesh e kanë dënuar me forcë ndalimin nga Izraeli të Flotiljes Global Sumud , e cila po transportonte ndihma humanitare dhe aktivistë ndërkombëtarë në Rripin e rrethuar të Gazës.
Flotilja, që transportonte ushqime dhe ilaçe, u ndalua nga forcat detare izraelite, duke marrë kritika nga udhëheqës në disa kontinente.
Kryeministri malajzian, Anwar Ibrahim dënoi atë që e quajti “kërcënim dhe shtrëngim” të Izraelit kundër civilëve të paarmatosur dhe anijeve humanitare.
Në një deklaratë për X, ai akuzoi Izraelin se po tregonte “përbuzje të plotë jo vetëm për të drejtat e popullit palestinez, por edhe për ndërgjegjen e botës”. Malajzia konfirmoi se të paktën 12 shtetas të saj ishin në bordin e anijeve të sekuestruara.
Ministri i Jashtëm i Irlandës, Simon Harris, i quajti veprimet e Izraelit “thellësisht shqetësuese”, duke e përshkruar flotiljen si “një mision paqësor për të hedhur dritë mbi një katastrofë të tmerrshme humanitare”.
Presidenti kolumbian, Gustavo Petro përshkallëzoi tensionet diplomatike duke dëbuar diplomatë izraelitë dhe duke denoncuar marrëveshjen e tregtisë së lirë midis dy vendeve. Petro e etiketoi kryeministrin izraelit Benjamin Netanyahu një “kriminel global” në një postim të veçantë në X.
Ministri i Jashtëm i Venezuelës, Yvan Gil, i kritikoi veprimet e Izraelit si kriminale, duke deklaruar se bllokada e ndihmës ishte “një metodë e qëllimshme lufte” dhe “një vazhdim i gjenocidit me mjete të tjera”.
Ministria e Jashtme e Turqisë gjithashtu dënoi përgjimin, duke e quajtur atë një “akt terrorist”.
Qeveria britanike shprehu shqetësim serioz, duke theksuar se ndihma duhet t’u dorëzohet grupeve humanitare dhe se Izraeli duhet të heqë “menjëherë dhe pa kushte” kufizimet për ndihmën që hyn në Gaza.
Spanja thirri përfaqësuesin më të lartë të Izraelit në Madrid në përgjigje të operacionit detar, me Ministrin e Jashtëm Jose Manuel Albares që konfirmoi se 65 shtetas spanjollë ishin në bord. Izraeli më parë kishte tërhequr ambasadorin e tij pasi Spanja njohu shtetësinë palestineze.
Brazili gjithashtu e dënoi përgjimin, duke vënë në dukje se ligjvënësja Luizianne Lins ishte midis 15 qytetarëve brazilianë në bordin e flotiljes. “Përgjegjësia për sigurinë e të ndaluarve tani i takon Izraelit”, tha Ministria e Jashtme e Brazilit.
Kryeministri i Pakistanit, Shehbaz Sharif, e përshkroi incidentin si një “sulm të ndyrë”, duke bërë thirrje për lirimin e menjëhershëm të të ndaluarve. “Krimi i tyre ishte të transportonin ndihma për popullin e pafat palestinez”, deklaroi ai.
Organizatorët e flotiljes e kanë akuzuar Izraelin për “agresion aktiv”, ndërsa thirrjet për llogaridhënie dhe akses të pakufizuar humanitar në Gaza vazhdojnë të shtohen.
