Përzgjedhësi i Zvicrës Murat Yakin, në konferencën e parë për gazetarë pasi publikoi listën e futbollistëve për ndeshjet e tetorit, ka folur edhe për kalimin e Albian Hajdarit te Kosova.
Qendërmbrojtësi ka qenë pjesë e skuadrave zinxhirë të Zvicrës, por zgjodhi vendin e prindërve, duke zemëruar zviceranët që edhe muajin e kaluar e kishin humbur në të njëjtën mënyrë Leon Avdullahun.
Sipas asaj që raporton gazeta zvicerane Blick.ch, ky vendim i Hajdarit vjen pas kalimit të tij në Bundesligë, çka ka ndryshuar edhe pritshmëritë e tij në karrierë.
Yakin e konfirmoi vendimin dhe komunikimin e hapur që ka pasur me futbollistin.
“E kemi pranuar vendimin e tij. Nuk mund ta ndikojmë. Ka pasur një komunikim të qartë mes nesh,” është shprehur Yakin.
A duhet ndryshuar sistemi i zgjedhjes së kombëtareve? Në këtë pikë, trajneri Yakin thekson se përfaqësuesja funksionon mbi bazën e meritës:
“Nuk është që duam të angazhojmë lojtarë vetëm që të luajnë për ne. Ne bazohemi në parimin e performancës,” theksoi trajneri, duke shtuar se ndeshjet e pakta nuk e lejojnë eksperimentimin e panevojshëm: “Për ne ka rëndësi kualifikimi. Në plan të parë është rruga sportive.”
