Komisioni Qendror i Zgjedhjeve e ka bërë lëmsh sezonin 2025/26 në Superligën e Kosovës në basketboll, ndonëse xhiroja e parë pritet të zhvillohet këtë vikend.
Pra, sezoni 2025/26 në Superligë do të nis më 4 shtator dhe xhiroja e parë pritet të zhvillohet të shtunën edhe dielën, por nuk dihen datat e xhirove tjera për shkak se palestrat do të jenë në dispozicion të KQZ-së, si qendra votimi.
Federata e Basketbollit të Kosovës, të martën i ka dërguar kërkesë KQZ-së, për shfrytëzimin e palestrave për datat 4 dhe 5 tetor, duke pasur parasysh se KQZ prej të mërkurës për dhjetë ditë do t’i përdorë palestrat për Zgjedhjet Komunale që mbahen më 12 tetor.
Në përgjigjen e KQZ-së, të cilën e ka siguruar Tëvë 1, thuhet se “pas shqyrtimit të kërkesës, Komisioni Qendror i Zgjedhjeve, lejon shfrytëzimin e palestrave për datat 4 dhe 5 tetor, në përputhje me oraret e miratuara”.
Megjithatë, në kërkesën për datat 1 dhe 2 nëntor, KQZ nuk ka mundur të jap leje pasi palestrat do të jenë në shfrytëzim të KQZ-së për shkak të procesit zgjedhor.
“Pas shqyrtimit të kërkesës, Komisioni Qendror i Zgjedhjeve lejon shfrytëzimin e palestrave për datat 4 dhe 5 tetor 2025, në përputhje me oraret e miratuara dhe listën e bashkëngjitur në kërkesën tuaj.
Sa i përket kërkesës për datat 1 dhe 2 nëntor 2025, aktualisht nuk mund të japim leje për shfrytëzimin e palestrave, pasi ne këto data jemi ne proces zgjedhor dhe palestrat do te jenë në shfrytëzim nga KQZ, në përputhje me Ligjin Nr. 08/L-228 për Zgjedhjet e Përgjithshme në Republikën e Kosovës”, thuhet në përgjigjen e KQZ-së për FBK-në.
Palestrat “1 Tetori” në Prishtinë, “Minatori” në Mitrovicë, “Mizahir Isma” në Rahovec, “Sezai Surroi” në Prizren, “Karagaçi” në Pejë, “13 Qershori” në Suharekë dhe “Shani Nushi” në Gjakovë, janë në listën e objekteve që KQZ-ja, do ti përdor si qendra votimi dhe numërimi.
