Portieri i Suedisë, Robin Olsen, ka njoftuar për pensionimin nga kombëtarja pasi i është thënë nga selektori Jon Dahl Tomasson se nuk është më zgjedhja e parë.
35-vjeçari bëri gabim të madh te goli i parë i Sllovenisë në barazimin 2:2 muajin e shkuar në kualifikimet për Botëror, ndërsa u paraqit edhe në humbjen 2:0 nga Kosova ditë më pas, në ndeshjen e 79-të për Suedinë.
Federata e Futbollit të Suedisë, njoftoi për pensionimin e portierit veteran, ndërsa vetë Olsen në një intervistë ka thënë se vendimi për pensionim te kombëtarja do të vlejë derisa Tomassoni të jetë përzgjedhës.
Olsen ka thënë se nuk dëshiron të punojë me Tomassonin, i cili pritet këtë javë të publikojë listën për ndeshjet e këtij muaji kundër Zvicrës dhe Kosovës.
Olsen, që tash është te Malmo, ka luajtur për 10 vjet te Suedia kurse në një deklaratë të publikuar nga Federata Suedeze, ai e ka vlerësuar “nder të madh përfaqësimin e shtetit”.
