Fushata për kryetarë dhe asamblistë në katër komunat veriore tashmë ka nisur.
Përveç partive politike, që këtë herë do të jenë të gjitha – shqiptare dhe serbe – në garë për udhëheqjen e këtyre komunave janë edhe iniciativat qytetare.
Nexhat Ugljanin, nga komuniteti boshnjak dhe bartës i listës “Iniciativa për Mitrovicën e Veriut”, theksoi se po takohen me qytetarët për të siguruar votat.
Ai akuzon Listën Serbe se po ushtron presion ndaj ish-punonjësve serbë që u larguan nga institucionet e Kosovës.
“Faktikisht ata i kanë lëshuar institucionet dhe kanë ndikuar që punëtorë të tjerë gjithashtu t’i lëshojnë. Tash, kthimi i atyre do të jetë interes politik individual, ndërsa Lista Serbe përmes ndikimeve të saj synon të kontrollojë votat e tyre. Kjo është absurde në politikën që po zhvillon Lista Serbe”.
Edhe “Iniciativa për Mitrovicën” është në garë për zgjedhjet lokale.
Betim Osmani, që garon në këtë listë, tha se nuk është bërë sa duhet për veriun e Mitrovicës.
“Nuk është bërë aq sa duhet. Rreth 70% e qytetarëve shqiptarë nuk janë në pronat e tyre në veri dhe nuk kanë as adresat e tyre atje. Institucionet kanë bërë rindërtime dhe kthime, por jo bartjen e adresave, që do t’u mundësonte edhe votimin. Pas 26 vitesh, në vend që të kishim 7-8 mijë vota nga komuniteti shqiptar, kemi vetëm 1,500”, tha Osmani.
Zgjedhjet e jashtëzakonshme në katër komunat veriore u mbajtën më 18 dhjetor 2022, pasi partia më e madhe serbe në Kosovë, Lista Serbe, u largua nga institucionet e vendit. Kështu, shqiptarët u zgjodhën kryetarë komunash në katër komunat, megjithëse me një pjesëmarrje të ulët në votime.
