Qëllimet në jetë i ka të qarta
Bëhet fjalë për 26-vjeçarin Ardijan Berisha, i cili synon që përmes politikës të sjellë ndryshime të rëndësishme për komunitetin e tij.
Berisha, nga radhët e komunitetit ashkali, ka vendosur të garojë për asamblist në Kuvendin Komunal të Prishtinës si pjesë e partisë Guxo.
Ai pranon se angazhimi politik nuk ka qenë i lehtë, por thekson se motivimi për të arritur qëllimet është i madh.
“Çka më motivon të hyj në garë për asamblist janë padrejtësitë që shoh ndaj komunitetit. Ne nuk mund të trajtohemi si qytetarë të dorës së dytë, prandaj ka ardhur koha që të bëhen disa ndryshime pozitive për komunitetet”, deklaroi Berisha.
Një prej arsyeve që e shtyjnë të kandidojë, sipas tij, është mungesa e përfaqësimit të komunitetit ashkali në komunën e Prishtinës.
“Fatkeqësisht nuk ka përfaqësues nga komuniteti ashkali, dhe kjo e bën situatën më të dhimbshme, sepse sa herë dikush ka provuar të bëjë diçka, është dekurajuar”, tregoi ai.
Në fund, Berisha tregon se nga kush merr frymëzim në jetën e tij.
“Unë frymëzohem shumë nga Martin Luther King, i cili thoshte se drejtësia e vonuar është drejtësi e mohuar”.
Përveç angazhimit politik, Ardijan Berisha vazhdimisht kontribuon për të rinjtë e komunitetit ashkali, duke ofruar edhe ndihma humanitare. Ai thotë se shërbimi ndaj komunitetit është vlera më e rëndësishme e jetës së tij.
