Kongresmeni amerikan, Keith Self, ka zhvilluar një takim me presidenten e Kosovës, Vjosa Osmani, gjatë qëndrimit të saj në New York, ku po merr pjesë në punimet e javës së nivelit të lartë të Asamblesë së Përgjithshme të Kombeve të Bashkuara.
Përmes një postimi në rrjetet sociale, kongresmeni republikan ka falënderuar presidenten Osmani për takimin, duke përmendur se ajo kishte zhvilluar më parë edhe një takim me presidentin amerikan, Donald Trump.
“Jam mirënjohës presidentes Osmani të Kosovës që kaloi kohë me mua pas takimeve të saj me presidentin Trump dhe përfaqësues të Kombeve të Bashkuara,” ka shkruar Self në një postim në Facebook.
Takimi i Osmanit me kongresmenin Self u zhvillua në kuadër të agjendës së saj të ngjeshur në New York, ku presidentja e Kosovës po zhvillon një sërë takimesh me liderë botërorë dhe përfaqësues të lartë politik.
