Autor: Refki Morina
Dy vite më parë, më 24 shtator 2023, Kosova u përball me një nga momentet më të rënda pas luftës.
Në Banjskë ndodhi një sulm i organizuar, i cili nuk ishte thjesht një incident, por një akt terrorist me synim të qartë – të godiste shtetin e Kosovës, policinë e saj dhe sigurinë e qytetarëve tanë.
Në atë ditë të rëndë, ne humbëm një hero – rreshterin Afrim Bunjaku.
Ai u vra duke mbrojtur rendin dhe ligjin, duke bërë detyrën e tij me përkushtim deri në fund. Afrimi ishte një njeri i thjeshtë, një polic i devotshëm, por mbi të gjitha një atdhetar që dha jetën për vendin.
Ky përvjetor na kujton sakrificën e tij dhe njëkohësisht na bën më të vetëdijshëm se shteti ynë ende është i sfiduar.
Por, mesazhi që del nga ajo ngjarje është i qartë: Kosova nuk frikësohet, nuk zmbrapset.
Gjaku i dëshmorëve si Afrimi na obligon të jemi më të fortë, më të bashkuar dhe më të vendosur për ta mbrojtur vendin tonë.
Pra, sot nuk flasim vetëm për humbjen, por edhe për krenarinë.
Krenarinë që kemi pasur në mesin tonë njerëz si Afrimi, dhe përkushtimin që të gjithë ne ta çojmë përpara amanetin e tij – një Kosovë të lirë, të sigurt dhe demokratke;
Familja e Afrimit ka dhënë më të shtrenjtën për këtë vend.
Ata duhet të ndihen krenarë, sepse emri i Afrimit do të kujtohet gjithmonë me respekt e nderim.
Ne si shoqëri kemi obligim moral dhe institucional t’i qëndrojmë pranë, sepse sakrifica e tij nuk ishte vetëm për policinë, por për gjithë Kosovën.
Opinioni përmban pikëpamjet e autorit dhe nuk prezanton qëndrimet editoriale të teve1.info
