Këshilli i Sigurimit i OKB-së do të zhvillojë një takim urgjent të hënën, pas hyrjes së tre avionëve rusë në hapësirën ajrore të Estonisë, njoftoi të dielën Ministria e Jashtme e Estonisë.
Tre avionë luftarakë rusë MiG-31 shkelën hapësirën ajrore estoneze mbi Gjirin e Finlandës të premten, duke shkaktuar reagime të ashpra nga Bashkimi Evropian dhe NATO, të cilët e cilësuan incidentin si një provokim të ri të rrezikshëm. Moska, nga ana tjetër, e mohoi shkeljen.
Avionë italianë F-35, pjesë e misionit të NATO-s për mbështetjen e mbrojtjes ajrore në shtetet baltike, së bashku me avionë suedezë dhe finlandezë, u ngritën për të ndërprerë rrugën e avionëve rusë dhe për t’i paralajmëruar ata.
“Më 22 shtator… Këshilli i Sigurimit i Kombeve të Bashkuara do të thërrasë një takim urgjent në përgjigje të shkeljes së paturpshme të hapësirës ajrore estoneze nga Rusia të premten e kaluar”, thuhet në deklaratën e Ministrisë së Jashtme të Estonisë.
Kjo është hera e parë në 34 vite anëtarësim në OKB që Estonia – anëtare e BE-së dhe NATO-s, si dhe një përkrahëse e fortë e Ukrainës – kërkon zyrtarisht një mbledhje urgjente të Këshillit të Sigurimit.
