Jo shumë larg kilometra larg qendrës së kryeqytetit të Kosovës gjendet kjo ambulancë.
Në këtë qendër shëndetësore në fshatin Uglarë të Graçanicës gjithçka është e shkruar në gjuhën serbe.
Kjo ambulancë nuk është pjesë e sistemit të Kosovës.
Ndër vite ambulanca në fshatin Uglarë të Graçanicës jep shërbime për qytetarët serbë të kësaj pjese. Ky institucion funksionon si institucion paralel serb dhe punëtorët e së njëjtës paguhen nga Beogradi.
E në Kosovë veprojnë edhe shumë institucione të tjera shëndetësore e arsimore të cilat funksionojnë në sistemin paralel serb.
Por javën e kaluar, autoritetet në Kosovë e pezulluan punën e Fondit për Sigurim Pensional dhe Invalidor në Mitrovicën e Veriut, me arsyetimin se ky institucion nuk kishte dokumentacion të vlefshëm për ushtrimin e veprimtarisë.
Madje kryeministri Kurti, të enjten u bëri thirrje serbëve për integrim të institucioneve ku mes tjerash ai tha se do të punojnë për t’u bashkuar në një sistem të vetëm.
Mbyllja e këtyre institucioneve sipas Grupit për Studime Juridike dhe Politike, (GLPS) duhet të bëhet me shumë kujdes duke pasur parasysh ndjeshmërinë e kësaj çështje.
“Ne si GLPS, theksojmë që Qeveria duhet të këtë kujdes, më së pari të koordinojë veprimet e saja me akterët lokal si dhe me komunitetin ndërkombëtarë dhe në momentin që merren vendimi për mbylljen e këtyre institucioneve duhet të ketë qasje pak me sistematike, të bëhet një planifikim se çfarë dhe si të mbyllet dhe si përfundimi është shumë e rëndësishme që në momentin që mbyllet një institucion paralel të hapet institucioni ekuivalent i sistemit të Kosovës në mënyrë që qytetarët të mos mbesin pa shërbime, është shprehur Besar Gëgi.
Edhe sipas ish zëvendësministrit, Valdet Hoxha, institucionet në Kosovë duhet të marrin vendime strategjike.
“Institucionet tona duhet të jenë të kujdesshme edhe çdo vendim pavarësisht në të drejtën e tyre legjitime dhe sovrane duhet të jetë vendim strategjik një vendim që natyrshëm në njërën nuk lejon veprimin e strukturave jo kushtetuese dhe në anën tjetër vendim strategjik që nuk i dëmtojnë raportet me partneret ndërkombëtarë dhe SHBA-në”, ka thënë Hoxha.
Pas pezullimit të punës në Fondin Pensional dhe Invalidor pati reagime edhe nga ndërkombëtarët të cilët kërkuan që autoritet në Kosovë të përmbahen menjëherë nga “shënjestrimi” i institucioneve shëndetësore që funksionojnë në sistemin e Serbisë.
Por zëvendëskryeministri në detyrë i Kosovës, Besnik Bislimi, tha se Prishtina zyrtare nuk synon mbylljen e institucioneve shëndetësore, duke theksuar se inspektorët lokalë kishin ndërprerë “përkohësisht” punën e Fondit për Sigurim Shëndetësor.
