Kanë kaluar tre javë nga fillimi i vitit të ri shkollor.
Por një numër i nxënësve ende nuk janë pajisur me libra.
Kjo për shkak të vonesave të krijuara në ekzekutimin e pagesave për prindërit që kanë aplikuar për t’u subvencionuar.
E të premten, Qeveria në detyrë e Kosovës ndau mbi 2 milionë euro për subvencionimin e teksteve shkollore.
“Nga MASHTI kemi pranuar kërkesën për transfer të brendshëm në vlerë prej 2 milionë e 41 mijë eurove që ndikon deri në 25 për qind të ndarjes së ndikuar negativisht nga Ligji për ndarjet buxhetore”, deklaroi ministri në detyrë i Financave, Hekuran Murati.
Drejtori i shkollës së Gjelbër në Prishtinë thotë se ka raste të prindërve të cilët janë ankuar për mosmarrjen e të hollave të dedikuara për blerjen e teksteve shkollore.
“Përveç një prindit që ka ardhur dhe na ka thënë që nuk i kanë dal mjetet, të gjitha punët nga ana e shkollës janë përfunduar. Në fillim të gjitha kërkesat e prindërve janë aprovuar dhe nuk ka pas shqetësime të tjera”, deklaroi drejtori i Shkollës së Gjelbër, Besart Ismajli.
Pas këtyre vonesave, kanë reaguar edhe nga Sindikata e Bashkuar e Arsimit të cilët e kanë quajtur të gabuar rrugën që MASHTI ka zgjedhur për blerjen e teksteve shkollore.
“Është një rrugë e gabuar, çka po përsëritet edhe në vitin e tretë që po ka vonesa por përveç vonesave është krijuar edhe një pabarazi në mes të nxënësve, ku disa nxënës që vijnë nga familjet me kushte ekonomike më të larta i kanë siguruar librat kurse nxënësit që kanë kushte me të dobëta jo që kanë shkuar në këto dy javë por do të shkojnë edhe në tërë muajin e ata nuk do të kenë libra”, deklaroi Vjollca Shala nga SBAShK-u.
Ky është viti i tretë që Ministria e Arsimit subvencionon blerjen e teksteve shkollore, e kësaj radhe nxënësit nga klasa e 1-5 marrin nga 80 euro për blerjen e teksteve shkollore dhe materialeve mësimore , kurse ata nga klasa e 6-9 nga 80 euro për blerjen e fletorëve të punës dhe materialeve mësimore.
