Federata e Basketbollit të Kosovës (FBK) ka përcaktuar afatin e fundit për procesin e licencimit të klubeve për sezonin e ri 2025/26. Vendimi është marrë nga Bordi i FBK-së më 18 shtator, pas propozimit të Sekretares së Përgjithshme, Elvira Dushku.
Sipas këtij vendimi, të gjitha klubet që nuk e kanë përmbushur ende dokumentacionin e kërkuar për licencim obligohen ta dorëzojnë atë brenda pesë ditëve të punës nga data e vendimit, pra deri më 25 shtator 2025. Pas këtij afati, klubet që nuk i kanë plotësuar kriteret nuk do të kenë mundësi të marrin licencën dhe, si pasojë, nuk do të përfshihen në garat e sezonit të ri.
FBK thekson se ky vendim është marrë duke u bazuar në parimet e barazisë dhe korrektësisë, transparencës dhe integritetit të garës, me qëllim që në kampionat të marrin pjesë vetëm klubet që i përmbushin standardet e nevojshme.
Zbatimin e këtij vendimi do ta bëjë Sekretarja e Përgjithshme e FBK-së, ndërsa ai ka hyrë në fuqi ditën e miratimit nga Bordi.
