Një grua 59-vjeçare është gjetur pa shenja jete në orët e mëngjesit të së enjtes në ujërat e kanalit Ibër-Lepenc në komunën e Zubin Potokut.
Sipas Policisë së Kosovës, rreth orës 07:20, është pranuar një informacion se një person kishte dalë nga shtëpia rreth orës 06:40 dhe dyshohej se kishte rënë në kanalin e ujit.
“Menjëherë pas pranimit të informatës, njësitë policore në bashkëpunim me zjarrfikësit kanë ndërmarrë veprimet e nevojshme për kërkim në terren,” thuhet në njoftimin zyrtar të Policisë.
Rreth orës 08:00, trupi i pajetë i viktimës, e identifikuar me inicialet R. M., është gjetur rreth 3 kilometra larg vendit ku dyshohej se kishte rënë në kanal. Trupi është nxjerrë nga uji nga ekipet e shpëtimit.
“Në vendngjarje ka dalë ekipi mjekësor, i cili ka konstatuar vdekjen e viktimës. Po ashtu, në vendin e ngjarjes kanë dalë edhe njësitë e hetimeve rajonale,” ka konfirmuar Policia e Kosovës.
Sipas policisë, në lidhje me rastin është njoftuar prokurori i shtetit, i cili ka urdhëruar që trupi i pajetë të dërgohet në Institutin e Mjekësisë Ligjore për obduksion, me qëllim të sqarimit të rrethanave të vdekjes.
“Policia e Kosovës, në koordinim me institucionet relevante, po vijon me procedurat e nevojshme ligjore lidhur me këtë rast,” thuhet në fund të njoftimit.
Rrethanat se si ka ndodhur ngjarja mbeten ende të paqarta, ndërkohë hetimet janë duke vazhduar.
