Pas fitores 2:1 ndaj Olympique Marseille në Champions League, Vinicius Jr. ishte i pari që la fushën e lojës, ndërkohë që shokët e tij të ekipit ishin ende në mes të fushës duke festuar dhe duke iu falënderuar tifozëve për mbështetje.
Braziliani, i cili u fut në lojë në minutën e 63-të, ka luajtur rreth një gjysmë ore, dhe për të, kjo ishte ndeshja e pestë ku nuk arriti të luante 90 minuta. Dy herë ai ka hyrë në lojë si zëvendësues, ndërsa tre herë është zëvendësuar.
Roli i tij si rezervë nën drejtimin e trajnerit Xabi Alonso po bëhet një temë e nxehtë në mediat spanjolle. Gazeta “AS” shkruan se, pavarësisht mënyrës se si Alonso përpiqet ta justifikojë këtë vendim, “ajo që po ndodh nuk është normale.” Sipas tyre, situata e Vinicius Jr. ka ngjallur shumë diskutime, sidomos pasi një ndeshje në Champions League, si ajo ndaj Marseille në Santiago Bernabéu, është diçka shumë më ndryshe se një përballje me një ekip të ri në ligën spanjolle si Oviedo.
Derisa Alonso e ka menaxhuar me sukses situatën deri tani, duke i dhënë mundësi Rodrygo-s të jetë i pranishëm në formë të shkëlqyer dhe të shënojë një penallti të rëndësishme, Vinicius ka arritur të bëhet përsëri faktori vendimtar kur hyri në lojë. Driblimi i tij i mençur çoi në penalltinë që i siguroi Real Madrid fitoren ndaj Marseille. Po ashtu, edhe në ndeshjen kundër Oviedo-s, Vinicius kontribuoi me një asist dhe një gol.
Megjithatë, ky sukses nuk ka mundur të fshehë shqetësimin e Brazilianit, i cili nuk duket të jetë i kënaqur me rolin e tij të rezervës. Ky shqetësim u shfaq qartë në ndeshjen kundër Real Sociedad San Sebastian, kur Vinicius tregoi pakënaqësinë e tij pas zëvendësimit, duke e lënë të kuptohet se ambiciet e tij janë më të mëdha se kaq.
Në këtë kontekst, trajneri Alonso është i fiksuar pas rotacionit të lojtarëve, një qasje që ka funksionuar deri tani, pasi ka shpërblyer lojtarët si Rodrygo (24) dhe Franco Mastantuono (18), ndërkohë që edhe Brahim Diaz (26) është pjesë e kësaj skeme. Trajneri ka theksuar pas ndeshjes me Marseille se për shkak të kalendarit të ngjeshur, ai ka nevojë për çdo lojtar të ekipit, dhe se secili do të ketë momentin e tij për të treguar vlerën.
“Askush nuk duhet të ofendohet nëse nuk luan,” tha Alonso pas ndeshjes me Marseille. Po ashtu, ai shtoi se “Kush e meritoi, do të luajë,” dhe kjo është një nga parimet që do të përsërisë gjatë gjithë sezonit.
