Para debutimit të Real Madridit në Ligën e Kampionëve, Xabi Alonso, i ka për herë të parë këtë sezon në dispozicion dy mesfushorët Jude Bellingham dhe Eduardo Camavinga.
Dy lajme të mira për të dhe Real Madridin vijnë në formën e një rikthimi, që përkon gjithashtu me fillimin e Ligës së Kampionëve, kompeticioni i preferuar i “Los Blancos”.
Jude Bellingham dhe Eduardo Camavinga janë rikthyer me skuadrën dhe përbëjnë dy risitë kryesore në listën e të grumbulluarve, ku nuk janë përfshirë Rüdiger dhe Mendy për shkak të lëndimeve.
Fillimisht, rikthimi i Bellingham ishte parashikuar për tetor, madje më shumë drejt mesit të muajit, pas operacionit në shpatull në korrik. Megjithatë, rikthimi i tij tani i jep atij gati dy javë kohë për të rifituar ritmin para derbit madrilen ndaj rivalëve të qytetit, Atletico Madrid, në fund të muajit.
Ndërkohë, Eduardo Camavinga gjithashtu kthehet në fushë pas 4.5 muajsh, pasi pësoi një shqyerje të tendinës në prill. Ai kishte provuar të rikthehej për Kupën e Botës për Klube, por atëherë pësoi një pengesë tjetër gjatë procesit.
