Melissa Jefferson-Wooden është zgjuar të hënën si kampione e botës në 100 metra vrapim dhe po ashtu si atletja e katërt më e shpejtë në histori.
Me vrapimin e jashtëzakonshëm prej 10:61 sekonda, amerikania Jefferson-Wooden, e fitoi të artën të dielën në Kampionatin Botëror të atletikës që po mbahet në Tokio të Japonisë.
Jefferson-Wooden vendosi rekord të kampionatit. E dyta ishte Tina Clayton e Xhamajkës me kohë prej 10.76 sekonda. Julien Alfred e Shën Luçias ishte e treta me kohë prej 10.84 sekonda.
Tani amerikania Jefferson-Wooden ia ka vërë syrin rekordit të botës në vrapimin 100 metra. Ajo beson se vrapimi nën 10.5 sekonda është i mundur.
Rekordi prej 10.49 sekonda, i vënë nga Florence Griffith-Joyner në vitin 1988 mbetet i paarritshëm për dekada të tëra. Ai rezultat solli shumë pyetje prej atëherë, por rekordi qëndron.
Më së afërti rekordit i është afruar Elaine Thompson-Herah e Xhamajkës. Ajo në vitin 2021 kishte kohë prej 10.54 sekonda.
Jefferson-Wooden është ende 24-vjeçare dhe rezultatet e saj po përmirësohen vazhdimisht. Ajo beson se është e aftë të arrijë nivelin për rekord të ri të botës.
“10.61 sekonda natyrisht është rezultat shumë i mirë. Dhe nuk lë vend për diskutime. Por përfundimisht mendoj se rekordi botëror është i mundshëm. Besoj se dje kisha potencial për të vrapuar 10.5. Për këtë edhe e them këtë për rekordin”, ka thënë sprinterja amerikane.
Ajo thotë se është dashur të shkëputet më herët nga atletet tjera, ndonëse është e kënaqur me paraqitjen.
