Me një paraqitje të jashtëzakonshme të basketbollistit shqiptar, Erxhan Osmani, Turqia e ka dominuar Greqinë dhe ka siguruar finalen në Eurobasket 2025.
Në ndeshjen e dytë gjysmëfinale, turqit shkelën Greqinë me rezultat 94:68 për të kaluar në finale, atje ku të dielën, në Riga, do të luajë kundër Gjermanisë.
Turqit ishin mbizotërues që nga periudha e parë, duke pasur avantazh prej 10 pikëve, 26:16, me paraqitje monstruoze të Osmanit i cili i vetëm i realizoi 14 pikë për 10 minuta.
Avantazhi i turqve gjatë ndeshjes arriti deri në 31pikë, 61:92.
Erxhan Osmani i lindur në Bajram Curri të Tropojës zgjodhi ta përfaqësoj Turqinë, aty ku suksesshëm në kampionatin evropian u paraqit edhe Kenan Spahiu, basketbollisti i lindur në Prishtinë.
Osmani ndeshjen e mbylli me 28 pikë e 6 kërcime. Pikë dyshifrore te Turqia patën edhe Alparen Sengun (15 pk, 12 krc, 6 ast), Cedi Osman (17 pk, 3 ast) dhe Shane Larkin (14 pk, 5 ast).
Giannis Antetoukounmpo, ylli i Ligës NBA që luan për Greqinë, ndeshjen e mbylli me double-double prej 12 pikë e 12 kërcime.
Të dy kombëtaret finaliste, edhe Turqia por edhe Gjermania, arrijnë për të tretën herë në finale të Eurobasketit, me gjermanët që e kanë fituar një herë titullin e Evropës në vitin 1993, derisa Turqia asnjëherë.
Finalja e Eurobasket 2025, luhet të dielën në Riga të Letonisë, duke nisur nga ora 20:00.
