Komandanti i misionit të udhëhequr nga NATO në Kosovë (KFOR), gjeneralmajor Enrico Barduani, dhe Shefi i Zyrës së Bashkimit Evropian në Kosovë (BE) dhe Përfaqësuesi Special i BE-së, Sh.T. Aivo Orav, kanë nënshkruar sot një Memorandum Mirëkuptimi (MoU), i cili rregullon mbështetjen dhe asistencën që KFOR-i mund të ofrojë në rast të zhvendosjes apo evakuimit gjatë situatave kritike.
Përmes këtij memorandumi, KFOR-i dhe Zyra e BE-së formalizojnë procedurat që forcojnë besimin e ndërsjellë, qartësojnë rolet dhe rrisin nivelin e koordinimit, duke u mundësuar të dyja misioneve të përgjigjen në mënyrë efikase dhe të bashkërenduar brenda mandateve të tyre përkatëse.
Ky memorandum është dëshmi e përkushtimit të aktorëve ushtarakë dhe civilë për të bashkëpunuar në mënyrë proaktive, duke rritur gatishmërinë, stabilitetin dhe sigurinë në terren, sidomos në rrethana sfiduese.
“KFOR-i vazhdon të zbatojë mandatin e tij – të bazuar në Rezolutën 1244 të Këshillit të Sigurimit të OKB-së të vitit 1999 – për të kontribuar në një ambient të sigurt dhe të qëndrueshëm për të gjithë qytetarët dhe komunitetet që jetojnë në Kosovë, si dhe për të garantuar lirinë e lëvizjes në çdo kohë dhe në mënyrë të paanshme. KFOR-i punon ngushtë me Policinë e Kosovës dhe Misionin e BE-së për Sundimin e Ligjit në Kosovë (EULEX), në përmbushje të roleve të tyre përkatëse si përgjigjës për sigurinë”, thuhet në njoftim
