Të zgjohesh herë pas here i djersitur nuk është domosdoshmërisht shkak për shqetësim, veçanërisht nëse ndodh gjatë temperaturave të larta ose gjumit të keq.
Megjithatë, nëse kjo ju ndodh vazhdimisht, mund të jetë një problem.
Shëndeti Publik Britanik (Shërbimi Shëndetësor Kombëtar) deklaron se në këtë rast duhet patjetër të kërkoni ndihmën e një mjeku.
Të rriturit dhe fëmijët mund të vuajnë nga kjo, dhe shkaku ndonjëherë është i panjohur.
Megjithatë, mjekja e përgjithshme Suzanne Wylie i tha Metro.co.uk se kjo ndodh shpesh gjatë menopauzës për shkak të mënyrës se si hormonet ndikojnë në temperaturën e trupit. Ajo gjithashtu renditi shkaqe të tjera si ankthi, apnea obstruktive e gjumit, hiperhidroza, infeksionet, problemet me tiroidet, diabeti dhe, në raste të rralla, kanceret si limfoma.
“Ato mund të jenë gjithashtu një efekt anësor i disa ilaçeve, duke përfshirë edhe antidepresivët”, tha ajo.
Zgjimi i djersitur mund të ndodhë edhe për shkak të faktorëve “të thjeshtë” si ngrënia e ushqimeve pikante, konsumimi i kafeinës ose alkoolit, ose ushtrimet fizike vonë natën.
Edhe nëse flini gjithsej shtatë deri në nëntë orë, siç rekomandojnë ekspertët, gjumi i ndërprerë mund të ndikojë në funksionin e trurit, shëndetin fizik dhe mirëqenien emocionale./telegrafi
