Pas humbjes së thellë nga Zvicra në hapje të kampanjës kualifikuese për Botërorin 2026, Kombëtarja e Kosovës ka premtuar reflektin në duelin kundër Suedisë.
Ndeshja Kosovë – Suedi, luhet sot prej orës 20:45 në stadiumin “Fadil Vokrri” në Prishtinë dhe i takon xhiros së dytë të Grupit B kualifikues.
“Dardanët” e nisën ciklin kualifikues me disfatë 4:0 në Basel kundër Zvicrës të premten e shkuar, ndërsa selektori Franco Foda pret paraqitje dukshëm më të mirë ndaj Suedisë.
Në konferencën për shtyp para ndeshjes, jo vetëm Foda por edhe mbrojtësi i krahut, Mërgim Vojvoda, kanë insistuar se duan fitoren për të reaguar pas humbjes së thellë në Basel.
Të dy kanë vlerësuar lart kundërshtarët, sikurse edhe selektori i Suedisë, Jon Dahl Tomasson që ka pasur fjalë të mëdha për “Dardanët”.
Për dallim prej Kosovës që e nisi me humbje kampanjën kualifikuese, Suedia në xhiron e parë barazoi 2:2 në udhëtim te Sllovenia.
Tribunat e stadiumit “Fadil Vokrri” do të jenë të stërmbushura për këtë ndeshje, pasi tashmë janë shitur të gjitha biletat.
Kosova do të jetë pa kapitenin Amir Rrahmani të lënduar, ndërsa te Suedia nuk dihet nëse Alexander Isak do të aktivizohet prej fillimit përkrah Viktor Gyokeresit në fazën ofensive.
