E diela i mblodhi bashkë delegatët e Këshillit të Përgjithshëm të Lëvizjes Vetëvendosje.
Në mbledhjen e 59-të, morën një vendim të rëndësishëm, që rrjedh nga zgjedhjet e 9 shkurtit.
Para tyre, do të propozohej mandatari i partisë kryeministër, përkundër vendimit të Gjykatës Kushtetuese, që ia ndaloi Kuvendit çdo veprim për formimin e qeverisë së re, deri më 30 shtator.
“Në emër të Këshillit po e nominojmë Albin Kurtin për kryeministër, është vetëm një formalizim i asaj që është vërtetë, më e rëndësishmja është që Albin Kurti, në zgjedhjet e 9 shkurtit është personi më i votuar ndonjëherë në Republikën e Kosovës, prej kur ne kemi zgjedhje”, tha Konjufca.
Me asnjë votë kundër e asnjë abstenim, u miratua që Kurti të jetë mandatar për kryeministër.
Para delegatëve, Kurti shpalosi disa nga zotimet për qeverinë e re.
“Gjatë mandatit të ardhshëm paga minimale do të rritet në mbi 500 euro. Paga minimale, e njëjta nuk do të tatohet”, tha Kurti.
Ai potencoi se përgjatë mandatit të ri katër vjeçar, prioritet do të jenë investimet në ushtri.
“Do të avancojmë njësinë e dronëve dhe antidronëve për të forcuar mbikëqyrjen dhe gatishmërinë për t’u përballur me format e reja të rreziqeve të sigurisë, duke ndihmuar në hetime, mbrojtje dhe mbikëqyrje të kufirit, si dhe rritjen e sigurisë publike në përgjithësi. Për ushtrinë tonë, për katër vitet e mandatit tonë të ardhshëm do të ndajmë buxhet mbi 1 miliardë euro”, tha Kurti.
Një shumë e njëjtë, Kurti tha se do të ndahet edhe për zhvillimin ekonomik.
“Për prodhimtarinë dhe ndërmarrësinë, ne do të veprojmë përmes Bankës Zhvillimore, programit prej 1 miliardë euro për prodhim dhe për ndihmesë të bizneseve. Secili investitorë do të ketë mundësinë të përfitojë një garanci që shteti do të ofrojë, për kreditë e nevojshme për investim. Për të mbështetur likuiditetin e bizneseve, mbledhja mbi tatimit mbi vlerën e shtuar, për mallrat që hyjnë në kufi, do të zhvendosim nga kufiri në brendi të vendit”, tha Kurti.
Në kuadër të këtyre zotimeve, ishin edhe rritja e numrit të bursave për studentë në universitete publike e private, si dhe shtim i kategorive të subvencionimit për fëmijë e të kategorive në superpuna.
