Viti i ri akademik në Universitetin e Prishtinës nis më 15 shtator.
Një pjesë e studentëve veç se janë pranuar tashmë në afatin e parë, ndërsa aplikimet në konkursin plotësues vazhdojnë ende.
Rezultatet përfundimtare nuk janë shpallur, por sipas ish-zëvendësministrit të arsimit, Dukagjin Popovci, këtë vit pritet të ketë rënie të numrit të të interesuarve për studime.
“Ne që tani e dimë që numri vitin tjetër, edhe pas pesë vitesh, numri i maturantëve do të jetë edhe më i vogël se sivjet. Tani, po të ishte Universiteti në ndonjë vend të zhvilluar, do të duhej menduar për ndërkombëtarizimin, për sjelljen e studentëve nga vendet e tjera. Tek ne kjo gjë nuk është e aplikueshme. Pra, ajo çka mund të bëhet është racionalizimi i programeve të studimit, së pari në sektorin publik, pastaj edhe Agjencia e Akreditimit mund ta ulë numrin e lejuar të studentëve për regjistrim, në mënyrë që fokusi të jetë te cilësia. Por nuk pres të ketë rritje të numrit të studentëve në Kosovë, përkundrazi, do të ketë zvogëlim”, deklaroi ish-zëvendësministri I Arsimit, Dukagjin Pupovci.
Sipas Pupovcit, tash e disa vite, rreth 53% e studentëve janë në sektorin publik, ndërsa 47% e studentëve janë në sektore private.
E arsyjet pse studentët po zgjedhin kolegjet private, sipas tij, mund të jenë të ndryshme.
“Arsyet mund të jenë individuale: duke filluar nga ajo që i përshtatet më mirë orari i punës, e tjera, deri te një perceptim qëështë krijuar tek njerëzit se në kolegjet private më lehtë merret diploma. Tani, ajo nuk do të thotë se është ashtu, por një perceptim i tillë, megjithatë, ekziston”.
Edhe për njohësin e arsimit, Rinor Qehaja, numri i të interesuarve për të studiuar në universitetin publik është një trend në ulje.
Sipas tij, UP-ja duhet të rifrekskojë profilin e tyre dhe të vërë vëmendjen tek studentët.
“Përgjithësisht kemi një trend në ulje të të interesuarve për institucionet publike të arsimit të lartë dhe kjo është në konotacion me mungesën e një oferte atraktive për studime për maturantët, por edhe mbi të gjitha edhe me profile jo të përditësuara me kërkesat të verteta tëtregut”, deklaroi Qehaja.
Ndërsa nga Universiteti i Prishtinës, nuk kanë akoma statistika rreth numrit të studentëve të pranuar për vitin akademik 2025-2026.
Kjo pasi, pranimi i tyre ende nuk ka përfunduar.
Kronikë e realizuar nga gazetarja Adea Mustafaj.
