Të dielën, Vetëvendosje do të mblidhen për mbajtjen e Këshillit të Përgjithshëm.
E këtu sipas burimeve të televizionit do të vendoset për emrin e mandatarit për kryeministër.
Menjëherë, emri i tash kryeministrit në detyrë, Albin Kurti, do t’i dërgohet edhe të parës së shtetit, Vjosa Osmani.
Mirëpo se si do të veprojë presidentja në këtë rast, sipas profesorit Avdi Smajljaj është vështirë të parashikohet.
Sipas tij, Osmani do të duhet të ketë kujdes që të mos bëjë shkelje.
Nga Presidenca nuk kanë kthyer përgjigje se cilët hapa do t’i ndërmarrin në vazhdim.
Por nga Gjykata Kushtetuese kanë thënë se deri më tani përveç Listës Serbe, nuk kanë pranuar ndonjë kërkesë të re nga Presidentja Osmani, ose edhe nga partitë e tjera.
“Deri më tani nuk është pranuar ndonjë kërkesë e re nga Zyra e Presidentes. Ndërsa sa i përket kërkesës së Listës Serbe, kjo kërkesë aktualisht është duke u proceduar dhe e njëjta do të trajtohet në përputhje me Kushtetutën, Ligjin për Gjykatën Kushtetuese dhe Rregulloren e punës së Gjykatës”, thuhet nga Kushtetuesja.
Të shtunën e javës së kaluar, kryeparlamentari Dimal Basha vendosi që të konstituoj Kuvendin e Kosovës pa e zgjedhur edhe nënkryetarin e pestë, që i takon komunitetit serb.
