Autore: Jona Kelmendi
Prej 20 vitesh, në hyrje të “Parkut të lapsave” në Pejë, janë vendosur tri shkronja të mëdha, “ABC”.
Ato i ka punuar skulptori Besnik Lajqi, dhe simbolika e tyre është mjaft e veçantë.
Janë kujtim për nxënësit e vrarë në luftën e fundit në Kosovë.
“Ideja nisi kështu se unë kam qenë pjesëmarrës në luftë kom pa shumë fëmijë, nxënës të masakruar, të vramë kështu që jam ndier ton kohen keq, e kështu në vitin 2005 mendova të bëj diçka për ata e kështu vendosa në shenjë të respektit, të gjakut të atyre nxënësve që u masakruan nga regjimi fashist serb vendosa që ti vendos 3 shkronja ABC kështu që me kohen i vendosa duke falënderua edhe një mik timin që me ndihmoi me idea të tij gazetarin Marin Kelmendi”, thotë ai.
Ish-ushtari i UÇK-së, është i lumtur që ky monument, shpesh është vendi ku të vegjlit mësojnë tri shkronjat e para të alfabetit.
“Unë ndihem shumë mirë kur të paktën fëmijët kalojnë këtu edhe bëjnë foto dhe mësojnë tri shkronjat e para ABC. Të vegjlit nuk e kanë kohën ta kuptojnë por gradualisht në të ardhmen do ta kuptojnë siç e kanë kuptu edhe tjerët fëmijë të cilët në atë kohë ishin 5-6 vjeç sot janë 25 vite edhe më përshëndetin rrugës dhe ju kujtohet ajo ditë kur e zbuluam këtë ABC ku i shpërndava 300 abetare, 300 lapsa dhe 300 fletore”, shprehet Lajqi.
Të gjitha shpenzimet për këtë punim, Lajqi i ka mbuluar vet.
“Me të thon të drejtën unë kom kursy, por m’ka kushtu një shumë kogja e madhe atëherë se nuk kishte material por gjitha shpenzimet vet i përballova. Kështu edhe nxënësve në Drelaj ua bleva një minibus që të shkojnë në shkollë por fatëkeqsisht ajo shkollë u mbyll dhe minibusin e ka drejtoria e arsimit të Pejës”, thotë ai.
Kjo nuk është shenja e vetme e Lajqit në qytetin e Pejës.
Ai ka të vendosura punime, edhe në lagje të tjera të qytetit.
