Zhurma e nxënësve në oborrin e shkollës “Naim Frashëri” u rikthye me këtë 1 shtator.
Me buqeta të luleve në dorë, e me çanta në krahë shumë nxënës e filluan vitin e ri shkollor.
Mes emocioneve të shumta, Alberita Shala Ademi po e përcjell vajzën e saj në klasë të parë.
“Sot e kemi regjistruar në klasë të parë ju urojmë suksese të gjithëve, inshalla është një vit i mbarë”, thotë Alebert Shala, prind.
I lumtur për fillimin viti shkollor është edhe Bajram Dreshaj i cili këtë të hënë e përcolli mbësen e tij në klasën e katërt.
“Është një ditë e jashtëzakonshme, dita me e mira dhe më e lumtur për mua është që po e dërgoj mbesën në ditën e parë të vitit shkollor, i dëshiroj sukses kësaj dhe të gjithë të tjerëve”, shprehet Bajram Dreshaj.
Entuziazmi nuk mungoi as te vetë nxënësit e shkollës “Naim Frashëri” në Prishtinë. “Po gëzona shumë që po hi në klasë të katërt edhe veç shpresoj të e kem me fat dhe të lehtë. Për shokët për mësuese dhe me ka marr malli kur i merresha notat peshe”, thotë Rein Rama – nxënëse.
Të përgatitur për fillimin e vitit të ri shkollor u shprehen edhe nga shkolla “Emin Duraku” në kryeqytet, madje këtë vit kjo shkollë filloj me numër më të madh të nxënësve.
“Shkolla jonë si çdo vit tjetër është pjesë e reformave arsimore, këtë vit presim në shkollën tonë ciklin 6-9 të shkollës “Pjetër Bogdani” duke bërë kështu që tri shkolla janë shtrirë në një institucion. Çdo gjë ka shkuar mirë sipas planifikimit”, tha Osmani.
E me fillimin e vitit të ri shkollor, ministrja në detyrë e arsimit, Arberie Nagavci uroj të gjithë nxënësit, mësimdhënëist e prindërit.
“Sot nis një udhëtim i ri i dijes, i mbushur me sfida dhe mundësi të reja për të gjithë nxënësit, mësuesit dhe prindërit tanë. Ky është momenti kur fëmijët kthehen me buzëqeshje në bankat shkollore, të etur për të mësuar, për t’u rritur dhe për të realizuar ëndrrat e tyre”, u shpreh ministrja në detyrë e Arsimit, Arbërie Nagavci.
Por jo të gjithë nxënësit në Prishtinë patën mundësi të fillojnë vitin e ri shkollor këtë të hënë.
Dyert e shkollës “Zenel Hajdini” nuk u hapën këtë të hënë. Kjo për shkak të renovimeve. Drejtori i arsimit në kryeqytet Samir Shahini ka bërë të ditur se viti i ri shkollor këtu do të filloj me 8 shtator.
Njëjtë edhe në shkollën e fshatit Graboc të Fushë Kosovës, për shkak të renovimeve mësimi nuk fillojë këtë 1 shator.
