Autore: Jona Kelmendi
Maturantët janë rikthyer në bankat e shkollës, por kësaj radhe jo për mësim.
Rreth 5 mijë e 480 nxënës iu nënshtruan testit të maturës në afatin e dytë.
Një ndër shkollat ku u zhvillua ky proces në Prishtinë ishte shkolla teknike “28 Nëntori”.
Maturantët që kryen testimin në këtë shkollë treguan se testi nuk ishte i vështirë.
“Testi ka qenë i logjikshëm, nuk ka qenë shumë i vështirë, por gjithsej ka qenë mirë. Kjo është hera e dytë që po hyj në test dhe shpresoj që do ta kaloj. Edhe të tjerët shpresoj që do ta kalojnë”, thotë Venera Ademi- maturante.
“Testi nuk ka qenë shumë i vështirë. Pyetjet kanë qenë logjike dhe gjithçka ka shkuar mirë”, shprehet një tjetër maturant.
Ndërkohë, mbikëqyrësi i provimit në këtë shkollë deklaroi se gjithçka ka kaluar pa probleme dhe se disiplina e nxënësve ishte në nivel.
“Testi ka qenë në rregull. Nxënësit kanë qenë shumë të disiplinuar. Edhe pse është afati i dytë, nuk ka ndodhur ndonjëherë që të jenë kaq të disiplinuar. Gjithçka ka shkuar mirë – tash varet vetëm prej suksesit të tyre. Numri i pjesëmarrësve ka qenë përafërsisht i njëjtë, por janë zvogëluar paralelet. Gjithçka tjetër ka qenë në rregull”, tha Bedri Mustafa, mbikëqyrës.
Sipas njoftimit të MAShTI-t, hyrja në qendrat e testimit është mbyllur në orën 10:00 të mëngjesit.
Rezultatet e këtij afati do të publikohen më 1 shtator 2025 në platformën elektronike e-Kosova.
