Procedurat dhe afatet për formimin e Qeverisë, pasi të konstituohet Kuvendit
E marta i dha epilog edhe pikës së tretë të rendit të ditës në seancën për konstituimin e Kuvendit të Kosovës.
Por, pika e vetme e mbetur, solli dështimin e ri.
Kuvendi mbeti i pakonstituuar, meqë nënkryetarët nga radhët e komuniteti serb, nuk i morën votat e mjaftueshme në disa tentime.
E seanca konstituive, u shty sërish për 48 orë.
Por, çfarë ndodh pas konstituimit të Kuvendit të Kosovës?
“Pas konstituimit të Kuvendit, presidentja e Republikës së Kosovës e nominon kandidatin për kryeministër nga radhët e partisë më të madhe parlamentare, ose që e ka përfaqësimin më të madh në Kuvendin e Kosovës. E në këtë rast do duhej ta nominonte z. Albin Kurti dhe kandidati për kryeministër brenda 15 ditësh është i obliguar që të ia paraqes kuvendit kabinetin bashkë më programin qeverisës për votim.”, ka treguar avokati, Arbër Jashari.
E për votimin e qeverisë së re, nevojitet shumica e thjeshtë prej 61 votash.
Ndërkaq Kushtetuta ka paraparë edhe skenarin kur mandatari i parë nuk arrin ta marrë besimin e shumicës së deputetëve.
“Në rast se nuk merr shumicën e nevojshme prej 61 votash, atëherë çështja kthehet serish tek presidentja e cila sipas suazave të një aktgjykimit të Gjykatës Kushtetuese, e cila ka diskrecion të vlerësoj se cili grup tjetër parlamentar i ka gjasat ta formojë shumicën e ta zgjedh qeverinë, mund të ja jep të drejtën të dominohet një mandatar nga një parti e dytë apo e tretë në Kuvend, por nëse partia e parë ka gjasë ta bëj qeverinë, të ja jep prapë VV-së mundësinë”, ka shpjeguar Vullnet Bugaqku nga KDI.
Sipas tij, në rast se edhe në tentimin e dytë nuk formohet qeveria, vendi shkon në zgjedhje të parakohshme.
