Leon Avdullahu dhe Eman Koshpo morën vendim për të mos përfaqësuar Zvicrën në nivelin ndërkombëtar, por Kosovën përkatësisht Bosnjë e Hercegovinën.
Agjenti i dy futbollistëve, Sascha Fischer ka sqaruar vendimet e kliëntëve të tij, duke u fokusuar tek Avdullahu që vendosi të bëhet “Dardan”.
“I kuptoj emocionet dhe gjithashtu zhgënjimin që shumë njerëz në Zvicër mund ta ndiejnë aktualisht. Leoni u rrit këtu, u arsimua këtu dhe Zvicra do të mbetet gjithmonë shtëpia e tij”, ka thënë Fischer.
Fischer u shpreh se është e rëndësishme ta vlerësojnë siç duhet vendimin e Avdullahut për të luajtur për Kosovën.
“Vendimi nuk u mor kundër Zvicrës, por për Kosovën. Shpesh dëgjon në futboll se lojtarët ndjekin vetëm paratë dhe karrierën. Në këtë rast, është krejt e kundërta: Leoni zgjodhi Kosovën nga bindja, zemra e tij dhe identiteti familjar”, shtoi Fischer.
Avdullahu dëshiron ta përdorë emrin dhe reputacionin e tij për të ndihmuar vendosjen e Kosovës në futbollin evropian dhe është i gatshëm për një përgjegjësi të tillë.
