Kryetari i Komunës së Vitisë, Sokol Haliti, ka thënë se bllokada për zgjedhjen e kryetarit të Kuvendit po i konvenon dikujt, por jo vendit.
Ai ka theksuar se nëse Lëvizja Vetëvendosje ka vullnet politik, çështja mund të zgjidhet shumë shpejt.
“Nëse VV-ja ka vullnet politik, atëherë kjo çështje e kryetarit zgjidhet nesër. Por, kjo bllokadë dikujt po i konvenon, por i konvenon edhe atyre që s’ia dojnë të mirën vendit. Është mirë që me insistua për ta gjetur një figurë unifikuese”, ka thënë Haliti në emisionin “Ditari” në Tëvë1.
Ai ka shtuar se ekzekutivi nuk duhet të propozojë emra për kryetar Kuvendi që aktualisht mbajnë poste ministrore dhe që kanë bërë shkelje gjatë ushtrimit të detyrës.
“Nga ekzekutivi nuk duhet të propozohen emra që momentalisht kanë bërë shkelje dhe këto shkelje duhet vlerësuar se janë shkelje të tolerueshme për shkak që shkelja e parë është ajo që e bëjnë me ushtrimin e detyrës si ministra, gjë që nuk është dashur. Në Kosovën tonë po ndodhin edhe gjëra të tilla”, ka deklaruar ai.
Haliti vlerëson se partitë politike duhet të tregojnë fleksibilitet dhe përgjegjësi për të tejkaluar ngërçin aktual, në mënyrë që Kuvendi të funksionojë sa më parë.
