Edhe pse punimet kanë filluar që në vitin 2016, magjistrales Prishtinë – Podujevë, ende nuk po i shihet fundi.
Së fundmi, Ministria e Kulturës, përmes Inspektoratit të saj, ka vendosur të ndërpresë çdo aktivitet ndërtimor në këtë projekt infrastrukturor me arsyetimin se zona e punimeve mund të prekë hapësira me vlera të trashëgimisë kulturore.
Konkretisht, sipas MKRS-së, hapësirën e asetit të trashëgimisë kulturore ‘Lokaliteti Arkeologjik Kalaja në Kuline’, në fshatin Teneshdoll, Komuna e Prishtinës.”
Nga ky dikaster thanë se janë të përkushtuar të mbrojnë çdo herë asetet e tilla.
Vendimin e MKRS-së po e përkrahin edhe nga shoqëria civile – organizata AVONET.
“Pavarësisht se çfarë projekti është duke u implementuar në Republikën e Kosovës, nëse ka ndonjë të gjetur që përbën aset të trashëgimisë kulturore, apo që i përket historisë dhe ka vlerë të lartë apo të lashtë, punimet duhet të ndalohen. Kjo deri në momentin kur institucionet përcaktojnë nivelin dhe kategorinë e asetit në fjalë. Pavarësisht se projekti ka vazhduar për vite me radhë, në momentin e identifikimit të një aseti, punimet duhet të ndalen – ashtu siç janë ndalur – dhe kjo është në harmoni me ligjet pozitive të Kosovës”, ka thënë Kenan Gashi nga AVONET.
Ndërsa në anën tjetër nga Komuna e Podujevës, thonë se nuk kanë ndikim në ritmin e punimeve, pasi që ky projekt është kompetencë e Ministrisë së Infrastrukturës.
“Megjithatë, për shkak të vonesave për realizimin dhe përfundimin e këtij projekti ne në vazhdimësi kemi adresuar ankesat e qytetarëve tek organi përgjegjës për këtë projekt. Sa i përket lehtësimit të qarkullimit në komunikacion Ministria e Infrastrukturës në bashkëpunim me Policinë e Kosovës në momente të caktuara kur ka trafik të dendur ka orientuar automjetet në rrugë alternative, me qëllim të lehtësimit të lëvizjes dhe rritjes së sigurisë për qytetarët”, ka thënë zëdhënsi Fatri Zhitia.
Televizioni ka drejtuar pyetje edhe në Ministrinë e Mjedisit, Planifikimit Hapësinor dhe Infrastrukturës për të kuptuar se si do të veprohet tutje, por nga ky institucion nuk është marrë asnjë përgjigje.
