Ditën e nisën para Komunës së Prishtinës.
Këta anëtarë të Shoqatës së Transportit të Autobusëve të Podujevës protestuan sërish duke kërkuar tu lejohet të ndalen te “Xhamia e Llapit”.
Sipas kryetarit të kësaj shoqate, Beqir Mustafa, stacionin që u ka vendosur Komuna e Prishtinës nuk është i duhuri.
Ndonëse në muajin mars kishin arritur një marrëveshje, sipas Mustafës, ajo nuk është zbatuar nga zyrtarët komunalë të kryeqytetit.
“Nuk do të punojmë deri në realizimin e kërkesave tona, me na e respektuar rendin e udhëtimit që e kemi nga Ministria, atëherë punojmë, përndryshe le t’i bart ky udhëtarët….Këta nuk po punojnë për popull hiç. Ne kemi probleme – jemi marrë vesh me i heq taksistët, kanë hy andej edhe s’i kanë larguar”, është shprehur Mustafa.
Rreth këtij vendimi, ankesa patën edhe qytetarët që marrin atë rrugë çdo ditë.
Ata thonë se stacioni ku detyrohen të presin, paraqet rrezik për jetë.
“…Po i bien me u sill ne prej Podujeve me ardhë një orë e gjysmë këtu edhe 40 minuta deri në Stacion edhe aty bën një orë deri sa të shkojsh në punë – 5 orë kjo është tmerr. Për neve është tmerr, shumë keq na kanë bërë. S’po e kuptoj pse kështu”, ka thënë një udhëtare.
“…Nuk e lënë të parkohet autobusi, duhet me dalë në semafor, rrezikohet jeta e qytetarit, është shkollë publike aty rrezikohet jeta e nxënësve, e mësimdhënësve. Ata kanë plotësisht të drejtë nëse kundërshtojnë pse presim ne aty, por Komuna duhet të bëjë një zgjidhje për neve udhëtareve”, është shprehur edhe një udhëtare tjetër.
Por nga Komuna e Prishtinës janë të prerë në qëndrime.
“…Qarkullimi brenda kryeqytetit nuk do të lejohet assesi, kthimi nga stacioni i ashtuquajtur ‘Xhamia e Llapit jo se jo’. Jemi duke tentuar që kërkesat tjera t’i plotësojmë, këtë e them që do të ketë mundësi që të dialogohet për dy pika që janë taksitë ilegale që janë preukopim ynë dhe kërkesë e tyre dhe pika tjetër është që disa linja tjera që i ka të kontraktuara Komuna të mos kalojnë në territorin e Podujevës”, ka thënë Donat Lushaku, drejtor i mobilitetit.
Nga kjo drejtori thanë se në zonat ku u është caktuar të operojnë këta autobusë, ekzistojnë të gjitha shenjat që tregojnë ndalesat, edhe pse fizikisht nuk ka një stacion të ndërtuar.
Për të ruajtur rendin dhe qetësinë gjatë kësaj proteste, të pranishëm ishin edhe Policia e Kosovës.
