Kryetari i Lidhjes Demokratike të Kosovës (LDK), Lumir Abdixhiku, ka reaguar pas aktgjykimit të Gjykatës Kushtetuese, duke thënë se kjo gjykatë ka konfirmuar qëndrimin e hershëm të LDK-së se Lëvizja Vetëvendosje dhe kryesuesi i Kuvendit, Avni Dehari, kanë shkelur Kushtetutën dhe kanë bllokuar punën e Kuvendit.
“Siç edhe pritej, për secilin me mendje institucionale, Gjykata Kushtetuese sot vërtetoi qëndrimin e LDK-së – insistimin tonë të hershëm – se veprimet e Kryesuesit të Kuvendit dhe Lëvizjes Vetëvendosje përbënin shkelje flagrante të Kushtetutës, duke rezultuar në bllokimin e institucioneve të vendit”, ka shkruar Abdixhiku në Facebook.
Ai ka theksuar se për 48 herë radhazi u bllokuan seancat, duke e cilësuar këtë si “rekord të turpshëm dhe të pashembullt në historinë parlamentare të vendit”.
Sipas tij, Gjykata ka riafirmuar se as kryesuesi më i moshuar e as partia më e madhe nuk kanë të drejtë të veprojnë jashtë Kushtetutës apo të shpikin procedura që minojnë demokracinë.
“Zgjedhja e Kryetarit dhe Nënkryetarëve të Kuvendit bëhet vetëm me votim të hapur, deri në tre herë për një kandidat, dhe brenda afatit kushtetues 30-ditor”, ka shtuar Abdixhiku.
Kreu i LDK-së e ka quajtur këtë aktgjykim “fitore të madhe, jo vetëm të LDK-së, por të Republikës së Kosovës dhe qytetarëve që duan institucione funksionale e transparente”.
“Mosrespektimi i këtij vendimi nuk është opsion. Nuk do ta lejojmë asnjë përbuzje të shtetit dhe Republikës. Në këtë vend, mbi Kushtetutë nuk ngrihet askush”, ka përfunduar ai.
