Avokati Ardian Bajraktari, i ka cilësuar alarm serioz për rendin dhe sigurinë publike në Kosovë vrasjet e fundit që kanë ndodhur.
Ai tha se fakti që vrasjet po kryhen nga recidivistë, tregon se dënimet për veprat penale nuk po e kanë efektin e duhur.
“Alarm për rendin dhe sigurinë publike në vendin tonë për faktin se brenda një periudhe kaq të shkurtër të ndodhin kaq shumë vrasje natyrisht që kjo është për shqetësim. Fakti që edhe një pjesë bukur e madhe e tyre jo rrallë herë po rezultojnë të jenë përsëritës të kryerjes së veprave penale – kjo nënkupton që edhe shkalla e lartësisë së dënimeve nuk ka arritur efektin dhe po ashtu duhet marrë hapa urgjent në këtë drejtim”, tha ai në emisionin “Info Nata” në Tëvë1.
Ai theksoi se një numër i madh i armëve ilegale gjendet në qarkullim.
“Sipas statistikave një numër i konsiderueshëm i armëve ilegale ndodhen në duart e qytetarëve, flitet se janë rreth 250-300 mijë sosh. Krahasuar me numrin e përgjithshëm të popullsisë, kjo statistikë tregon shqetësim të madh, prandaj duhet një angazhim në drejtim të uljeve të këtyre statistikave. Prezenca e tyre në duart e qytetarëve është rrezik permanent për rendin, sigurinë e për fat të keq po rezulton edhe me humbje të jetëve”, deklaroi ai.
Pesë raste të vrasjeve kanë ndodhur ditët e fundit në Kosovë, ku kryesit e veprave janë në arrati dhe të njëjtit po kërkohen nga organet relevante./teve1.info/
