Të paktën 26 migrantë u mbytën pasi dy anije u përmbysën pranë brigjeve të ishullit italian Lampeduza në Mesdhe, raportoi të mërkurën agjencia e lajmeve ANSA.
Që kur varka e ngarkuar me emigrantë u përmbys pranë brigjeve të Lampeduzës, deri më tani janë gjetur rreth 26 trupa dhe ka 30-40 të zhdukur dhe 60 të mbijetuar, ndërsa operacionet e shpëtimit janë ende në vazhdim, tha agjencia.
ANSA njoftoi se midis tetë trupave të parë që mbërritën në Lampedusa, dhe që tashmë janë çuar në morgun në varrezat Cala Pisana, janë një foshnjë e porsalindur, dy burra të rritur, dy gra dhe tre adoleshentë (dy djem dhe një vajzë).
Ende nuk janë zbardhur shumë detaje të kësaj tragjedie, por agjencia italiane e lajmeve ANSA raportoi, duke cituar rrëfimet e disa të mbijetuarve, se pasi një nga anijet, që ishin nisur së bashku, filloi të përmbytej, disa migrantë u zhvendosën në anijen tjetër, e cila u mbingarkua dhe filloi të mbushej me ujë.
“Dhimbje e madhe për tragjedinë e një tjetër anijeje pranë bregut të Lampedusës, ku UNHCR po asiston tani të mbijetuarit. Duket se janë gjetur 20 trupa dhe po aq mungojnë”, shkroi në rrjetet sociale, Filippo Ungaro, zëdhënës i Agjencisë së Kombeve të Bashkuara për Refugjatët.
Ministri i Brendshëm Matteo Piantedosi konfirmoi se dy anije u fundosën, duke thënë se ngjarja ndodhi 14 milje detare nga Lampedusa.
Disa media kanë raportuar se 97 persona ishin në dy anijet.
Emigrantët ishin nga Pakistani, Sudani dhe Somalia, thanë zyrtarët.
Sipas raportimeve, refugjatët, të cilët u nisën nga Libia, janë me kombësi pakistaneze, sudaneze dhe somaleze.
