Të martën shkalla e dytë e Gjykatës Komerciale aprovoi ankesën e Zyrës së Rregullatorit për Energji, duke refuzuar shtyrjen e ekzekutimit të vendimit për treg të lirë të energjisë elektrike.
E, avokati, Ardian Bajraktari, ka thënë se në disa takime të mbajtura me përfaqësues të sektorit privat, ai ka rekomanduar që të veprohet me kujdes, pasi ekziston rreziku që subjektet të mbesin pa furnizim me energji nëse nuk ndërmarrin hapa për të nënshkruar kontrata të reja.
Sipas Bajraktarit, qasja e Zyrës së Rregullatorit për Energji (ZRrE) ndaj bizneseve ka qenë tepër jo-miqësore dhe çdo neglizhencë për të reflektuar ndaj zhvillimeve të fundit mund të ketë pasoja serioze për furnizimin me energji.
“Dje u bë publike se Gjykata Komerciale e ka aprovuar si të bazuar ankesën, prandaj nënkupton se masa pezulluese apo sigurimi i padisë nuk është më në fuqi dhe do të kemi dalje në treg të hapur, për çka unë në disa takime të mia me bizneset edhe rrjedhimisht rekomandimi im ishte që të jenë të kujdesshëm në raport me faktin që lehtësisht mund të mbesin pa furnizime, për shkak se tashmë qasja e ZRrE-së dihet një qasje tepër jo miqësore në raport me bizneset. Mund të mbesin pa furnizim në rast se këta eventualisht nuk reflektojnë në drejtim të nënshkrimit të kontratave për faktin se vendimi i Dhomës së shkallës së dytë është i plotfuqishëm dhe i njëjti mund të zbatohet për aq kohë sa le të themi nuk ka vullnet për ta gjetur një konsensus”, ka thënë ai në emisionin “Ditari” në Tëvë1.
