Disa ditë më parë, Meta lansoi një “hartë” në aplikacionin Instagram që përdor vendndodhjen e përdoruesve të llogarisë, dhe i shënon ata në vendet ku ndodheshin kur publikonin postimet.
Përdoruesit besojnë se kjo është një shkelje e privatësisë, ndërsa Meta thotë se nuk do ta ndajnë kurrë vendndodhjen e tyre.
Vetëm pak ditë pasi Instagram prezantoi opsionin e ri të Hartës së Instagramit, rrjetet sociale u përmbytën me komente të përdoruesve, kryesisht negative, bazuar në shkeljen e privatësisë së tyre.
Ndërsa disa janë vetëm paksa të irrituar që Instagram po kopjon “Hartën e Snapchat” në vend që të lejojë burimin klasik me postime vetëm nga miqtë, të tjerë shprehin shqetësime serioze në lidhje me problemet e mundshme të privatësisë, doxxing dhe rreziqet e sigurisë, veçanërisht për viktimat e dhunës në familje ose njerëzit që mund të bëhen shënjestra të ndjekjes.
Meta pretendon se kjo veçori është ekskluzivisht “opt-in”, që do të thotë se përdoruesit vendosin vetë nëse duan të ndajnë vendndodhjen e tyre aktive me miqtë e zgjedhur.
Edhe pse harta është projektuar për t’ju lejuar të shikoni postimet dhe videot Reels nga miqtë dhe krijuesit, të organizuara sipas vendndodhjeve të shënuara në përmbajtjen e tyre, shumë po kërkojnë një mënyrë për ta çaktivizuar këtë opsion.
Hap pas hapi, duhet të hapni Mesazhet në këndin e sipërm të djathtë të burimit, të prekni Hartën në krye të kutisë hyrëse dhe të zgjidhni opsionin “askush” në Cilësime. E gjithë kjo duhet të konfirmohet duke klikuar Përditëso.
Instagram thotë se nëse përdoruesi nuk ka lejuar qasje në vendndodhje në cilësimet e telefonit, harta çaktivizohet automatikisht dhe nuk është e mundur të qaseni në opsione.
CEO i Instagram, Adam Mosseri, theksoi se përdoruesit shohin vendndodhjet e postimeve dhe videove Reels në hartë, jo vendndodhjen aktuale të pronarit të profilit, dhe se vendndodhja e tyre aktuale nuk ndahet dhe nuk do të ndahet kurrë pa leje.
