Policia e Kosovës është duke ndërmarrë masa të shtuara për lokalizimin dhe arrestimin e Mefail Shkodrës dhe dy djemve të tij, të dyshuar për vrasjen e trefishtë që ka ndodhur të dielën në Gjilan.
Zëdhënësi i Policisë së rajonit të Gjilanit, Ismet Hashani ka apeluar që kushdo që ka informacione për ta, të kontaktojë policinë.
Hashani për teve1.info tha se Policia ka njoftuar të gjitha pikat kufitare dhe ka zhvilluar bastisje në vendet ku “kanë besuar” se mund të strehohen të dyshuarit.
“Policia e Kosovës ka ndërmarrë masa të shtuara për lokalizimin dhe arrestimin e të dyshuarve të këtij rasti të rëndë. Përveç masave operative që i kemi në vazhdimësi kemi apeluar edhe përmes mediave duke i bërë publike profilet e personave të dyshimtë të kërkuar dhe kushdo që posedon informacion në lidhje me vendndodhjen e tyre ta kontaktoj Policinë e Kosovës ku do qoftë në stacionin ma të afërt”.
Nga vrasja e rëndë që dyshohet se ndodhi për shkak të fajdes, viktima mbetën Selami dhe Edmond Hasani (babë e bir) dhe Abedin Hoxha./teve1.info/
