Është gjykatë e Kosovës me seli në Hagë.
Por, disa nga provat që Prokuroria Speciale vendosi t’i paraqes kundër katërshes së UÇK-së, erdhën nga shteti serb.
Ky veprim, ngjalli reagime të shumta në vend.
Për këtë çështje, Tëvë1 ka pyetur në Dhomat e Specializuara në Hagë.
Këta të fundit e kanë pranuar se me vendimin e 29 majit, Paneli Gjyqësor ka pranuar si prova një numër të madh dokumentesh, përfshirë provat nga autoritetet serbe.
Por, sa peshë do t’u japë atyre, thonë se është çështje që do të vendoset nga gjyqtarët gjatë shqyrtimit përfundimtar të të gjitha provave të pranuara.
“Dua të filloj duke sqaruar rolin e Panelit Gjyqësor lidhur me provat. Palët, Prokuroria dhe Mbrojtja, zgjedhin vetë se cilat prova dëshirojnë të përdorin për të mbështetur rastin e tyre. Kur pranojnë provat e paraqitura nga palët, gjyqtarët e Dhomave të Specializuara ndjekin Ligjin e Dhomave të Specializuara dhe Rregullat e Procedurës dhe të Provave. Në fund të çështjes, gjatë shqyrtimit për aktgjykim, ata i vlerësojnë me kujdes të gjitha provat e pranuara, të paraqitura nga Prokuroria dhe Mbrojtja. Vendimi për pranueshmërinë e provave gjatë gjykimit është i ndarë nga vlerësimi përfundimtar i të gjitha provave të pranuara në aktgjykim”, thuhet nga Gjykata Speciale.
Por, njohësit e ligjit në Kosovë, thonë se do të ketë pasoja të mëdha nëse Paneli Gjyqësor vendos t’ua fal besimi këtyre provave.
Madje, avokati Ardian Bajraktari, thotë se për provat serbe, Prokuroria Speciale i priti momentet e fundit.
“Sa i përket çështjes së bashkëpunimit me autoritetet serbe, ka qenë në vazhdimësi ajo që e ka karakterizuar punën e kësaj prokurorie. Po ashtu, është për keqardhje fakti se një numër të madh provash, përfshirë edhe këto, i ka dorëzuar në momentet e fundit, për çka e ka vë në sprovë bukur të madhe palën mbrojtëse, për faktin se trupi gjykues e ka caktuar një afat realitivisht të shkurtë”, tha avokati Ardian Bajraktari.
E shqetësuar për këtë veprim të Prokurorisë Speciale, u shpreh të martën edhe e para e vendit.
“Mendoj që është jashtëzakonisht shqetësuese që cilado gjykatë e krijuar nga Republika e Kosovës, e cila e ka detyrim ligjor e kushtetues që të funksionoj sipas sistemit juridik të RKS-së, të pranoj prova të cilat i prodhon shteti i Serbisë”, u shpreh presidentja Vjosa Osmani.
Ndryshe, të enjten mijëra qytetarë kanë protestuar në sheshet e Prishtinës, kundër, sipas tyre, padrejtësisë nga Dhomat e Specializuara të Kosovës.
