Sot janë pezulluar nga detyra katër zyrtarë të Shërbimit Korrektues të Kosovës (SHKK), përfshirë drejtorin e Qendrës së Paraburgimit në Mitrovicë, një mbikëqyrës të lartë dhe dy zyrtarë korrektues, pas arratisjes së një të burgosuri nga kjo qendër.
I burgosuri D.R., i cili ishte dënuar me 14 vjet e 6 muaj burgim – nga të cilat i kishin mbetur edhe 3 vjet e 7 muaj – ka arritur të arratiset nga ambientet e institucionit, ndërsa ishte duke punuar në hapësirat e punëtorisë. Sipas SHKK-së, ai ishte i kategorizuar si i avancuar dhe ndodhej në listën e të burgosurve që mund të përfitonin lirimin me kusht.
Arratisja e tij ka ndodhur në rrethana që ende nuk janë plotësisht të qarta, dhe menjëherë pas konstatimit të mungesës së tij, janë aktivizuar të gjitha procedurat e brendshme operacionale, ndërkohë që janë njoftuar institucionet relevante të sigurisë.
Në një deklaratë për Tëvë1, Shërbimi Korrektues i Kosovës ka konfirmuar se janë nisur hetimet e brendshme për zbardhjen e plotë të rastit dhe paralajmëroi se do të merren të gjitha masat e nevojshme në përputhje me legjislacionin në fuqi.
SHKK thekson se është e përkushtuar për të garantuar sigurinë në institucionet korrektuese dhe llogaridhënien për çdo lëshim eventual.
